WILLEMSTAD – Djasabra último alrededor di 1300 boluntario a hisa por lo ménos 193.890 kilo di shushi durante World Clean Up Day Curaçao 2020. A kolekshoná e shushi na 80 lokalidat. Mas den e siman aki lo anunsiá e kantidat definitivo di kilo paso ainda tin algun lokalidat ku mester hiba sobra shushi Landfill na Malpais. E organisashon di e akshon di limpiesa ta satisfecho. 

E krísis di Corona tabatin efekto riba World Clean Up Day. Hopi boluntario a skohe e aña aki, pa motibu di prekoushon, pa no registrá òf a kanselá.  “Apesar ku nos ta lamentá esaki nos por tin solamente komprenshon pa nan desishon. P’esei nos ta mas orguyoso ainda di e grupo grandi di persona ku si a partisipá i e kantidat di shushi ku un biaha mas a bolbe limpia, segun kordinadó di boluntario Vicky Trinidad. E otro añanan a atraé entre 2000 i 3500 boluntario.

E organisashon di e akshon di limpiesa ta agradesido tambe na tur spònser ku a kontribuí tantu finansiero komo ku material, baki i vehíkulo pa prosesá e sushinan. “Sigur den e periodo ekonómiko duru aki nos sa kiko ta nifiká pa kompanianan tòg duna un aporte”, segun presidente di Stichting Curaçao Clean Up, Maarten Schakel.

Pa motibu di Corona e gruponan por a konsistí di maksimal 25 persona i mester a garantisá distansia sosial entre e boluntarionan mas tantu posibel. Loke ta notabel serka e boluntarionan ta ku entre otro e áreanan di Barbuquet, Las Almas, Nieuw Nederland i Skarlo ta supstansialmente limpi en komparashon ku aña pasa. E bario di Kustbatterij a partisipá pa promé aña en grande. Bou di awa tambe a limpia. 138 sambuyadó a limpia ref na 11 diferente playa di entre otro kùp, bòter i liña di piska. Loder i trùknan a tuma akshon pa hisa un kantidat grandi di shushi gròf: na Kustbatterij a hisa 50.000 mil kilo di shushi. Na e ruta  entre Ronde Klip i  Playa Kanoa a kolekshoná 40.000 kilo i trùknan a kore bai bin Landfill na Malpais.

Kontinuashon

Pa por duna e akshon di limpiesa kontinuashon a lansa djabièrnè un ‘‘World Clean Up Day Curaçao Himno’. Kantante Dibo D i produktor Menasa a traha e track ‘Limpia Bo’, ku mientrastantu ta viral riba media sosial. Ademas Stichting Curaçao Clean Up tin plan pa e próksimo siman entregá un petishon na Gobièrnu, Parlamentu i Sektor komersial ku ta enserá 5 punto di lansa pa un medio ambiente mas limpi: redukshon drástiko di gastu di depósito na Landfill, prohibishon di ‘single-use’ plèstik, un kampaña di konsientisashon i edukashon grandi pa un periodo largu, mas baki di shushi riba kaya i mas medio pa  kòntròl. Schakel: “Un medio ambiente limpi ta responsabilidat di nos tur. Ku e Clean up akshon nos a bolbe indiká esaki. Awor ta na otro partnernan manera polítika pa krea e kuadronan korekto pa di bèrdat tene e isla limpi.” Te ainda un kantidat di 4500 persona a firma e petishon i por sigui firma e dianan benidero riba bit.ly/korsoulimpi.