Willemstad, Kòrsou: Na kuminsamentu di yüni 2016 representantenan di Skempi i Maduro & Curiel’s Bank a formalisá un asosiashon di marka. Esaki ta e kulminashon di un laso ku a nase na aña 2014 dia Skempi a wòrdu nominá i a gana e Premio Komersiante Briante di MCB. E aña akí dicho konekshon a duna fruta ya ku awor e dos entidatnan a bira sosio.  Esaki a bini na un momentu hopi faborabel mirando ku e aña aki MCB ta selebrá su sentenario i e ta duna e representantenan di Skempi masha plaser di por selebrá e okashon grandi aki huntu ku nan.

E co-fundador i Mèneging Director di Skempi Boudino de Jong, a bisa tokante e partnership: “Nos ta sumamente orguyoso i honrá di por traha huntu ku MCB, un banko ku ta duna asina un gran aporte na nos komunidat i tambe esnan di henter Karibe Hulandes. Nos no tin ningún duda ku e asosiashon aki lo benefisiá tur dos banda i lo trese hopi momentu briante. Nos ta ansioso pa selebrá shen aña di eksistensia di MCB huntu ku nan.”

Skempi i MCB lo hasi esaki dor di duna bek na nos komunidat pa medio di muzik. Keda pendiente pa sa den ki forma esaki lo tuma lugá i tambe kua ta e otro proyektonan ku Skempi tin planiá ku MCB.