Den su afan pa un futuro mihó pa Kòrsou

WILLEMSTAD – Gerensia di e sentro di kompra Sambil ta masha serio den su afan pa huntu ku partnernan di sektor privá i públiko duna kontenido na e ophetivo pa prepará Kòrsou pa un futuro briante. Pa enfatisá esei, djaweps atardi Sambil a tene pa representantenan di Kámara di Komèrsio, VBC, Adeck (empresa chikí), DMO (Punda) i SKO (Otrobanda) un agasaho den sentro di kompra na Veeris. Loke a halsa e bon ambiente ta ku no tabatin diskurso. Den un esfera realmente informal miembronan di gerensia i miembronan di staf di Sambil por a sera konosí mihó ku e representantenan di e diferente órganonan kordinadó. Ku nan i ku otronan for di e komunidat di Kòrsou Sambil ke bai e reto pa traha pa un Kòrsou di futuro. No ta pòrnada ku Sambil ta pone tantu énfasis riba aktividat i atrakshonnan pa e hubentut di awor. Kaminda tabata deseá esei, a duna mas splikashon tokante desaroyonan di e sentro di kompra for di su inisio na fin di mei último, tokante e plannan pa e futuro serkano i kon lo sera lasonan ku otro gruponan di interes. Entre nan ta konta tambe ku organisashonnan di bario, pa kuminsá ku esnan di Veeris i Wishi / Marchena komo e bisiñanan mas serka. Ademas, Sambil gradualmente lo duna kontenido na e idea pa e ta un sentro di enkuentro pa otro evento, manera riba tereno di músika, deporte, ekspreshonnan kultural, etc. E wéspetnan tabatin oportunidat amplio pa hasi pregunta i tira un bista den e sentro di kompra ku dentro di no muchu tempu lo ta kasi kompletamente yen. Kasi tur siman pakus nobo ta habri kaminda anteriormente ainda tabatin bòrchi di ‘coming soon’ ta kologá.