Willemstad-  Djaweps dia 21 di desèmber Maduro & Curiel’s Bank a entregá su MCB Prize 2017. Bintiun (21) aña pasá Maduro & Curiel’s Bank a inisiá ku e tradishon di duna e asina yamá MCB Prize na un persona, evento òf organisashon ku a sobresalí i/òf a hasi mas impakto den transkurso di e aña en kuestion. Gerensia di Bo Banko Amigu a evaluá e aña i a otorgá MCB Prize 2017 na Green Force Curaçao. Un organisashon ku a bin ta hasi un impakto positivo riba nos ekonomia, pero prinsipalmente riba nos pais i nos siudadanonan.

Green Force Curaçao, di sr. Timo Brouwer, ta un kompania ku ta eksistí for di 2010 i ta pone atenshon na resiklahe, edukashon i konsientisashon komo tambe eksportashon di materialnan (sushi) pa resiklá. Esaki den su afan pa hasi nos komunidat mas konsiente pa biba un bida mas ‘bèrdè’ i resiklá mas ku ta posibel.

Maduro & Curiel’s Bank ku pa hopi aña kaba ta suprayá pa nos tur duna un aporte di bèrdè mes na nos medio ambiente pa nos yuda protehá nos pais i planeta pa futuro generashonnan, a skohe Green Force Curaçao ya ku esaki ta e aspekto prinsipal di e mishon i vishon di Green Force. Un organisashon ku a demostrá ku aparte di konsientisá nos komunidat, di chikí te grandi pa resiklá, a demostrá ku esaki por ta un negoshi eksitoso tambe.

Nos ta sostené e vishon di Green Force ku ta kere ku ora hopi hende hasi kosnan chikí, kosnan grandi ta tuma lugá. Si resiklahe ta un proseso fásil pa un i tur, nos por asumí nos responsabilidat pa deshasí di e sushi ku nos ta krea di un forma duradero. Nos por a tuma nota algun tempu pasá i tambe resientemente di e kantidat di sushi konsistiendo di entre otro plèstik, bateria di outo i bleki, ku e kompania Green Force a akumulá i eksportá. Esaki a yega un kantidat di 62.000 kilo di sushi den un luna. E sushi aki ta wòrdu transportá pa diferente pais ku lo trata nan resiklahe spesífiko. Ta di remarká ku den e último añanan Green Force Curaçao a akumulá mas ku mei mion kilo di sushi e aña aki i eksportá esaki pa resiklahe. Nos ta apoyá e hecho aki inmensamente ya ku esaki, aparte di yuda nos medio ambiente, ta hasi nos isla mas limpi, pues ta duna un empuhe na nos turismo i asina naturalmente tambe na nos ekonomia.

E kompania Green Force Curaçao por asta yuda’bo diseñá i krea un kas ‘bèrdè’ òf kualke otro proyekto duradero segun bo presupuesto i deseonan. Esaki tambe nos ta apoyá inmensamente. Otro proyektonan ku Green Force a forma un parti krusial den dje ta diferente sentronan di resiklahe na diferente lokashon rònt Kòrsou kaminda un i tur por depositá bòter, bleki òf glas pa resiklahe. Green Force no ta deskonosí na skolnan, kaminda aki tambe nan ta duna un kontribushon den forma di konsientisashon na nos muchanan. E diferente aktividatnan ku Green Force a sea organisá òf forma parti krusial di dje ta entre otro plantamentu di palu, kolekshon i resiklahe di bateria pa outo, un programa pa re-introdusí plantamentu di mangrove, resiklahe pa programanan i gruponan di deporte, akshonnan di limpiesa na diferente lokalidat riba nos isla, inkluso na diferente playa.

Ta di lamentá ku nos tin asina tantu sushi riba nos isla. P’esei nos ta apoyá e organisashon Green Force Curaçao ku tin netamente komo meta pa deshasí di tur e sushi aki di un forma duradero, pero tambe forma parti di e proseso di konsientisashon pa nos tur bira mas konsiente kiko nos ta kumpra i mas konsiente pa kuida nos medio ambiente. Pa e motibunan aki, Maduro & Curiel’s Bank ta felisitá sr. Timo Brouwer gerente di Green Force Curaçao i henter su tim pa nan aporte asina balioso i positivo pa yuda kuida nos medio ambiente, nos isla i nos planeta.

E potrèt(nan) ta ilustrá momentu di entrega di MCB Prize 2017 pa miembronan di gerensia den persona di Chicu Capriles, sra. Ruthsella Jansen i sra. Daisy Tyrol-Carolus na sr. Timo Brouwer di Green Force.