Willemstad,- Djabièrnè 8 di ougùstùs pa 9or di anochi lo bai tin estreno di e komedia Muhénan Wapu dirigí pa Eligio Melfor. Esaki lo tuma lugá na Teatro Luna Blou. Ya pa vários aña kaba Eligio Melfor a sa di entretené pueblo di Kòrsou ku su komedianan. Algun di nan tabata Hulanda mi ta bai, Gainan Fini i Bestia den Polítika. Awor e tei bek ku e komedia Muhénan Wapu. Miéntras preisnan di komestibel ta sigui subi, pueblo ta sigui sufri. Un muhé wapu ku ta fada ku e situashon ta disidí ku e ta bai kuminsá un revolushon kaminda amanan di kas mes ta bai kuminsá fiha preis ku nan ke paga den supermerkado. E hendenan presente ta sigui e sra. I nan ta kuminsá kue diferente produkto for di den rèki, bai kaha i paga loke nan ta pensa ta hustu. E kaheranan no por hasi nada pa para nan. Awor polisnan ta man na kabes pa haña e kulpabelnan. Ta kon lo para? Dia 8 di mei di e aña aki Sr. Eligo Melfor a keda homenahiá dor Teatro Luna Blou pa su gran invershon den e mundu di teater aki na Kòrsou. Un biaha mas Eligio Melfor ta usa situashonnan real ku ta pasando den nos komunidat i hinka nan den un bachi kómiko. Un obra kaminda públiko lo hari barika yen. I ta ku inmenso plaser Teatro Luna Blou ta invitá un i tur pa bin gosa di e komedia aki. No pèrdè e oportunidat di hari bo barika yen ku Muhénan Wapu. Karchi ta na balor di Nafl. 30,- i ta optenibel na takia di Teatro Luna Blou, Time to Time (saliña) i na Servei (Sta. Maria). Si bo tin e membercard di Teatro Luna Blou & La Tentashon karchi ta kosta Nafl. 27,50. Pa mas informashon chek nos página wep: www.lunablou.com, por yama na 462-2209 òf por chek nos Facebook: Teatro Luna Blou òf La Tentashon.