WILLEMSTAD –  Djárason 16 di mart Maduro & Curiel’s Bank a kontinuá ku nan aktividatnan pa yama nan klientenan ku ta bishitá nan brènchnan danki pa nan sosten, lealtat i nan konfiansa. E di tres aktividat na brènchnan den kuadro di MCB su rumbo pa 100 a tuma lugá na brènch di Punda (Plasa Jojo Correa). Parti paden di e brènch Bo Banko Amigu a sorpresá klientenan ku presentashon di Kantadó Mayó 2016 i tur kliente ku tabata tei presente a haña e oportunidat pa gana un Kompa Leon Gift Card. Na total Bo Banko Amigu a regalá 5 Kompa Leon Gift Card na balor di NAf. 100,–.Tambe MCB a sorpresá tur kliente ku a bishitá brènch di Punda for di 3or te ora brènch a sera, ku un dushi trit i un bunita rekuerdo. Mas atardi entre 5.00 p.m. i 6.00 p.m., riba Plasa Jojo Correa dilanti di nan brènch na Punda tabatin presentashon di baile di koleganan di Punda Branch, muchanan di Oranje School, MCB Centennial Band i Kantadó Mayó 2016. Tur presente a gosa un bòl i naturalmente tabatin algu pa sisti e stoma i baha e set. Komo muestra di apresio i sosten na e área di brènch di Punda, empleadonan i e Branch Manager di e brènch di Punda huntu ku miembronan di e tim di maneho di Bo Banko Amigu a hasi entrega di un chèk na balor di NAf. 5.000,– na Oranje School. Ku e donashon aki, MCB ta spera di por yuda maestronan i alumnonan di Oranje School pa nan por logra konkretisá algun di e bunita proyektonan ku nan tin planiá p’e skol.

Keda pendiente pasó e luna aki tambe, dia 15 di aprel Bo Banko Amigu lo bolbe sorpresá klientenan di un di su 14 brènchnan.