Un bon fiesta ku tremendo ambiente, ta e miho manera pa habri un aña nobo, i Amnesia New Year’s Eve 2015 ta priminti di bira un evento ku bo no por perde. Amnesia su fiesta di aña nobo a keda hinka den un bachi úniko i ta regresa bek na e tradishon kurasoleño unda variashon musikal ta para sentral. Manera ta kustumber, e fiesta ta tuma luga den e espasioso WTC, kual pa promé biaha, lo keda transforma den dos arena di dibertishon ku un ekspektakulo di lus i sonido, komplimenta pa un toke di kabaret. Ku dos podio distinkto, unda e promé lo konsentra riba EDM, Dance i otro ritmo elektróniko, e públiko lo gosa di e kontagioso músika di talentoso kompositor, produktor i DJ Jack Novak di Merka. Jacqueline “Jack” Novak a nasé na Chicago, unda komo adolesente ela eksperensia EDM pa promé biaha i enamora di e ritmo. Novak a muda pa New York pa un par di aña, unda ela traha komo modelo profeshonal, pa después kambia di direkshon kompleto i a opta pa un karera musikal na Los Ángeles. Pa dos aña ela profundisa den e arte di DJ i komposishon, pa finalmente hasi su debut na aña 2013 ku gran furor. E aña akí so, Novak a kompartí tarima ku artistanan popular manera Skrillex, Calvin Harris, Rihanna, David Guetta, Otto Knows, Hardwell, Nervo, Snoop Dogg, i A-Trak, djies pa menshona algún nomber, i asta bai di gira komo DJ pa e multi talentoso artista Pharrell Williams. Banda di Novak, nos talentonan local DJ Alex Sargo i DJ Natsui tambe lo ta kla pone drama i e konosido pianista Gino Coelho tambe lo trese un ‘showtime’ spektakular ku ta priminiti di ta memorabel. E di dos podio lo tin tremendo músika di dos banda famoso fo’i Hulanda, kende lo tenebo riba dansvloer te mainta. Pues Amnesia New Year’s Eve 2015 tin un kos pa tur hende. Karchinan ta na rason di 145 florin inklusivo O.B. i manera ta kustumber ta inkluí un ‘all inclusive’ bar. Karchinan ta disponibel na Albert Heijn, Bruna, Mensing’s Caminada, Pleincafe Wilhelmina, Fun Miles of na www.amnesia.cw. Pa mas informashon chéck nos página di Facebook.com/AmnesiaCuracao
Prepárabo pa un anochi eufóriko, unda tur bo sentidonan lo keda kaptiva dor di bon músika i un ambiente inolvidabel.