Karnaval 2016 den e aña ku ta bini ta hopi kòrtiku ya ku den apénas 6 siman tur aktividat mester tuma lugá. Konsekuentemente festival di Tumba su Fechanan tambe ta adelantá. Sinembargo direktiva ta hañando e señalnan ku tin basta interes pa loke ta trata partisipashon na Festival di Tumba.
Fechanan importante pa festival di Tumba 2016 ta:
- 10 di yanüari Inskripshon pa Festival di Tumba 2 or pa 6 or pm
- Entrega di letra ta djaweps dia 14 di yanüari pa mas tarda 8 or di anochi
- Djadumingu dia 17 di yanüari Sound chek pa 8 or di anochi
- 18, 19 I 20 di yanüari dianan preliminar pa festival di Tumba
- Djaweps dia 21 di yanüari presentashon di Mantel I Korona I Saka e sekuensia di e anochi final
- 21 di yanüari Gran Final Festival di Tumba
- 22 di yanüari Festival di Tumba Hubenil
Algun kambio festival di tumba 2016
Durante reunion general, miembronan a bai di akuerdo pa duna kompensashon èkstra na e gruponan ku no klasifiká. Un ke otro relashoná ku gastunan haltu di partisipashon i pa promové tambe ku tin mas inskripshon.
Kumpliendo ku deseo di miembronan ku ta eksistí un par di aña kaba, direktiva den kuadro di mas transparensha i mas efisiensia, ta duna oportunidat na tur partisipante ku entrega nan letra na e ora i fecha manera palabra, es desir te ku djaweps 14 di yanüari pa 8 or di anochi, pa durante un espasio di tempu di 3 minüt, splika e sekshon di hurado di melodia i letra e esensia di e komposishon. Pues kada kompositor lo tin oportunidat pa splika durante 3 minüt e puntonan mas prinsipal di su komposishon.
GIMIKS
E promé gimik pa Festival di Tumba 2016 lo tuma lugá djasabra dia 5 di desèmber entre 1 or pa 5 or na takia di Curaçao Festival Center. E preis spesial pa e promé gimik lo ta 55 florin pa kuater dia sekshon general i lo anunsiá ki dia e di dos gimmik lo tuma lugá fin di luna di desèmber.
Pa organisá i mantené un festival di Tumba musikal di e nivel i Tamaño di Festival di Tumba di Kòrsou, ta nesesario pa banda di benta di karchi, tin entradanan adishonal ku por kubri e gastunan haltisimo di organisashon.
E gastunan pa produkshon di Festival di Tumba sigur si tene kuenta ku transmishonnan di televishon direkto i via Pay per View ta hopi haltu i un parti di e gastunan aki ta keda kubri pa e branding Partnernan i Pay Per View.
E branding partnernan te na e momentunan ku ta sostené Festival di tumba 2016 ta:
- UTS
- MCB
- Hucor Holding
- Insel Air
- Refineria Isla
Ta trahando pa buska un o mas branding partner nobo pa Festival di Tumba 2016.
Kuerpo di Hurado
Pa Festival di Tumba 2016, lo tin un kuerpo di hurado ku vários kara nobo bou di direkshon di Billy Adams. Ta bon pa aksentuá aki tambe ku miembronan a bai di akuerdo pa amplia e sekshon di ambiente den kaya ku un miembro di Hurado mas.
Refuerso
Ta bon konosí ku na Kòrsou nos no tin bastante músikonan di e sekshon di brass ku por keda integrá den tur e agrupashonnan ku ta bai Festival di Tumba. Esaki ta pone ku nesesariamente mester importá músikonan profeshonal, espesialmente for di nos pais bisiña Venezuela. E músikonan aki ta bini pa un temporada kòrtiku pa ensayá i partisipá na Festival di Tumba i e miembronan a sugerí pa laga pago di e músikonan profeshonal nan aki tuma lugá via di AMAK, kontra di un tarifa mas abou ku tabata e kaso ku último añanan. Esaki relashoná ku e kambio di valuta di dòler pa entre otro bolívar a bira mas faborabel.