WILLEMSTAD – Desde promé di yanüari Curaçao Ports Authority (CPA) a bolbe sera un areglo di penshun kolektivo pa su empleadonan na ENNIA, ku un durashon di 10 aña. Un areglo di penshun kolektivo ta ofresé kondishonnan bentahoso i kobertura mas amplio. CPA ta haña esaki hopi importante pa e pakete di kondishonnan di labor di su empleadonan.

“Ku e pakete aki, ku ta trahá kompletamente na midí, nos empleadonan ta bon sigurá pa un penshun di behes pa bida largu. Danki na e seguro aki, no solamente nos empleadonan, sino tambe nan famia ta bon sigurá”, asina gerensha di CPA a deklará. “E eskoho pa ENNIA ta hasi posibel ku nos por duna nos empleadonan kobertura amplio i konseho profeshonal.”

ENNIA ta konsehá kada empleado tokante riesgonan financiero ku nan por keda konfrontá ku ne, manera por ehèmpel na momentu di invalides pa motibu di malesa òf aksidente. Gerensha di CPA ta sintié bon ku den e areglo kolektivo aki tambe tin bon kobertura pa su trahadónan den kaso di invalides òf fayesementu.

ENNIA ta gradisí Curaçao Ports Authority pa e bon relashon i e konfiansa, i ta entusiasmá pa sigui riba e kaminda di bon koperashon den futuro. “Building towards the Future”.