Trabounan di konstrukshon progresando ku velosidat na aeropuerto
Willemstad – Djarason atardi Curaçao Airport Partners a organisá un reunión pa prensa, pa informá tokante e último desaroyonan pa loke ta trata e trabounan di konstrukshon relatá na e proyekto ‘Airport Expansion’, siguí pa un ‘Food Tasting’ kaminda CAP a introdusí e fasilidatnan, restorant i tiendanan nobo ku awor tambe ta ofresé servisio na aeropuerto di Kòrsou.
Pa medio di un presentashon i un Food Tasting, Curaçao Airport Partners (CAP) a duna un ‘update’ riba e último desaroyonan pa loke ta trata e trabounan di konstrukshon relatá na e ekspanshon di aeropuerto di Kòrsou, i alabes a introdusí e restorant i tiendanan nobo ku awor tambe ta ofresé servisio na aeropuerto. E trabounan pa ekspande Curaçao International Airport i mehorá e aparensha i esfera ta progresando ku velosidat, i ku e ophetivo pa e biahero, i esnan ku ta laborá na aeropuerto, òf ku ta bishitá aeropuerto, por disfrutá di un eksperensha ekselente.
Konstrukshon ta kanando segun plan
Manager Airport Development señor Bryan Elshot a presentá e parti tèkniko di e desaroyonan, dunando un splikashon riba e lokual e bishitante i biahero lo mira i sinti na kambio durante i despues di e periodo di konstrushon. Parti di e proyekto di ekspanshon ta e traspaso pa e Area di Yegada nobo(Arrival Hall), kual ta wòrdu trasladá for di e alokashon pafó pa e gran area pegá na esaki. Un pasiyo temporal lo guia e biahernan pa e parti renobá di e Area di Yegada. Tambe den 2016/2017 lo konstruí e terminal nobo ku lo konektá e dos edifisionan di aeropuerto ku otro. E terminal nobo ku tres piso lo ofresé 50% mas espasio ku aktualmente ta e kaso i lo ofresé un infrastruktura ku lo promové e fluho di biaheronan ku ta yega òf sali, i alabes lo trese un mihó separashon entre e biahero ku ta keda i e biahero tránsito. Tambe lo bin un di dos Mirador na aeropuerto, algu ku CAP ta rekonosé ku ta importante pa komnidat di Kòrsou. Pa fin di aña lo kambia e sistema di parker pa e mesun sistema ku tin na Schiphol i London Heathrow, ofresiendo e usuario machin di paga moderno tantu den e sala komo pafó kaminda por paga ku sèn kèsh of pa medio di swipe of credit card. Lo modernisá henter e area di servisio di Carrental ku ta ser ofresé na aeropuerto i tambe lo adapta e infrastruktura di e zona di parker.
Plaza ku restorant i tienda
Aña pasa Curaçao Airport Partners a inisiá e trabounan di konstrukshon di e ‘Concession Plaza’. Aki, bishitantenan di aeropuerto por disfrutá di un ‘boulevard’ ku mas tienda, fasilidatnan kaminda por kome i bebe i mas ambiente. Na e tiendanan aktual, kual ta Café Barista, Sports Bar, Grab&Go, Zylo, Aldeasa, Sky Delicatessen, Britt Curaçao, Omni i Cinnabon, awor a añadí e servisionan i restorantnan ku èrko Wendy’s, Seal & Go (ku servisio di protekshon di maleta i benta), Aunty Anne’s, CuraCare Health&Beauty(na preis regular manera den tur e tiendanan di CuraCare) i e tan gustá cafetaria di Juan Valdez. Durante e ‘Food Tasting’ miembronan di prensa por a sera konosí ku e diferente produkto i kuminda dushi ku for di awor tambe ta wòrdu ofresé na Curaçao International Airport.
