Ku e deseo pa ofresé un otro tipo di enkuentro sosial e proyekto di Blue Sky Cigar Lounge a bira un realidat. Mayoria bar i café na Kòrsou ta ofresé e mesun konsepto sosial pa dibertishon, sea sinta òf para, e ta solamente pa bo disfrutá di un bibida òf kuminda den kompania di amigu òf famia. Den sierto kasonan tin algu di bailamentu, pero ta te ei e diversifikashon a yega. E idea di Blue Sky Cigar Lounge ta pa duna e klientenan un lugá kaminda nan por sinti nan mes na kas, relahá i disfrutá di kon simpel bida ta. Sea bo so òf den kompania, bida ta asina dushi ora bo ta ‘sip’ bo bibida preferí, humando un ‘Habano’ i sinta mira bida pasa bai. Sigá ta un parti dje kultura Karibense. E proyekto ku ta keda presenta awe ta basa riba un konsepto di bibida (no) alkohóliko, eksklusivo, un establesimentu di sigánan di klase i un lounge. Blue Sky Cigar Lounge ta e sitio na Kòrsou kaminda e kliente por kumpra, huma i disfrutá di un sigá den un ambiente ameno. Sea e kliente ke kumpra un sigá for di e variedat ekstenso di e sigánan mas fini optenibel riba merkado o ke simplemente sinta i disfrutá humando ‘esun’ sigá spesial ku su bibida preferí, BSCL lo por ofresé i satisfasé su deseo. E ophetivo di BSCL ta pa: E Cigar Lounge mas eksklusivo i sofistiká di Kòrsou. Ofresiendo e kliente lokal i e turista un surtido amplio di sigánan fini, un bar di bibida ‘premium’, BSCL su meta ta pa ta e mihó lugá kaminda un amante di sigá por bai i disfrutá di tur e plasernan ku bida ta ofresé. Respaldá pa e konosementu amplio di e produkto dor di su personal BSCL ta spera pa establesé un su nòmber komo un ‘cigar lounge’ i risibí e rekonosementu di e merkado lokal. BSCL ta para pa e kalidat mas haltu di sigá, kual produkto ta keda apresiá pa e merkado i ku ta sirbi e merkado kosmopolitano di Kòrsou masha bon. Kompará ku otro ‘lounge’ i barnan den merkado lokal, BSCL ta para pa kalidat haltu i servisio ekselente, esakinan ta ingredientenan pa momentunan memorabel. BSCL lo resaltá di tur sobra pa su manera di presenta e sigá, e konosementu, e entusiasmo di e mundu di sigá i e manera plasentero i alabes profeshonal pa sirbi e kliente. BSCL ta ofresé un ambiente eksklusivo, bunita, relahante ku servisio di un staf profeshonal i amikal.

BLUE SKY

Bibando pa promé biaha su soño komo empresario, Angeline Jones ta sinti e emoshon di bula pa promé biaha den e Blue Sky. Pa e motibu ei e nòmber ta referí na e sensashon di span bo halanan den e shelu blou bunita di Kòrsou. Blue Sky ta representá libertat, relahá i konfiansa. E komienso di BSCL ta humilde, pero e lo elevá su mes riba tur sobra na Kòrsou pa kombertí su mes den e mihó lugá pa selebrá e plasernan di bida aki na Kòrsou. Blue Sky Cigar Lounge ta habri di djaluna pa djabièrnè di 3’or di atardi pa 11’or di anochi. Djasabra i djadumingu BSCL lo ta habri di 12’or di mèrdia pa 12’or di anochi.