I pa prome bes ZOO-Tastic Summer Camp 2015

Willemstad – E tim dinamiko di Fundashon Parke Tropikal ta sigui traha riba e master plan di nos tur su parke di bestia nashonal, trabounan di limpiesa I mantenshon ta parti di e dia dia, desaroyo ta tuma su tempu I pa e motibu aki nos a titula nos master plan 2013 – 2023 pa por krea un Zologiko riba un nivel haltu. Nos ta yama un I tur ku ta aportando na e desaroyo DANKI! Nos tin un skèdjul di aktividat hopi variá pa temporada di fakansi kaminda grandi i chiki por bin disfruta di nos tur su parke di bestia. Ora bo jega na entrada di Parke Tropikal , pone atenshon I tuma algun minut lesa, kompronde I aplika e reglanan di nos tur su Parke, korda semper ku respet I ordu ta na prome luga!

Zoovie Picnic Night

Entrante djasabra 4di yüli i riba tur djasabra te dia 8 di augustus lo tin Zoovie Picnic Night. Pa un montante di solamente 5 florin of 250 Funmiles pa persona por disfruta di un pelikula den airu liber riba un big screen. Parke Tropikal a soru pa tin koi kome i koi bebe na bon preis. Uniko kos ku mester trese ta bo kama di pushi, stoel of laken pa sinta riba dje. E pelikula tur siman ta un sorpresa pero tur ta pelikulanan ku ta apto pa famia kompleto. E portanan ta habri for di 7 or di anochi i e pelikula ta kumisa mitar di 8 en punto. E fechanan pa e Zoovie Picnic Night ta 4,11, 18,25 di yüli, 1 i 8 di augustus.

ZOO-TASTIC SUMMER CAMP 2015

Parke Tropikal ta introdusi pa e periodo di fakansi 2015 pa prome bes un plan fakansi pa mucha entre 4 I 10 aña. E plan di fakansi ZOO-TASTIC SUMMER CAMP 2015 aki tin un durashon di 5 dia , di djaluna pa djabierne di 7.30 am pa 12.15 pm. Un siman hopi edukativo I great pa tur nos chikitinnan, riba kada dia lo tin un otro tema ku ta kuadra ku nos parke di bestia. Na final e Chikitin lo risibi un sertifikado di partisipashon I abo komo mayor lo tin e satisfakshon ku no unikamente bo yu a pasa bon pero a wordu eduka un tiki mas. E plan di fakansi aki lo dura unikamente 3 siman (6 pa 10, 13 pa 17 I 20 pa 24 di yüli ), pues luganan ta limita. Pa registra ta fasil. Manda un email na info@curacaozoo.com of bel na 7360188 of entre 8or am pa 2or pm tur dia di siman.

Bouncer i Zoo-bar

Pa seguridat di nos bestianan no ta permiti mas pa drenta parke ku konsumo propio. Pesei awor tin un Zoo-bar ku tin un sortido varia di koi bebe i snacks. Korda respeta regla I kome I bebe den e areanan permiti so. Tur dia den siman lo tin bouncer ku e muchanan por bula i pasa pret i riba tur djasabra mahinta 10or lo tin rondleiding edukativo di 1ora.Durante di e ora aki lo bo por sa I mira mas di nos parke den un otro forma.

Zootique

Nos Zootique lo ta habri tur djasabra durante ZOOVIE PICNIC NIGHT pa por kumpra t-shirt, peluche i otro artikulonan i kontribuí asina na fondo pa sigui drecha nos parke. Na Zootique tambe por hanja informashon kon pa bira un Amigu di Parke Tropikal dor di simplemente yena un formulario di standing order. Por hasi esaki for di 5 florin pa luna. Naturalmente tur otro donashon ta bon bini na nos Zootique.

Gruponan di Fakansi Plan Atenshon!

Pa hasi boso bishita na parke posibel, yama na ofisina na 7360188 tur dia di siman di 8am pa 2or pm I hasi boso reservashon. Parke lo no por permiti entrada di gruponan sin un reservashon, pa motibu ku nos mester informa adelanta di reglanan I kondishonan pa hasi boso bishita unu sumamente plasentero.

Orario di Parke Tropikal ta di djaluna pa djadumingu di 10 or di mainta pa 5 or di atardi.